Уоттаах сэриигэ ийэлэр күҥҥэ көрбүт көмүс оҕолорун, аймах хааны тэнитиэхтээх, аҕаларын аатын ааттатыахтаах уолаттарын сүтэрбиттэрэ.
I Бэрт Ууһун нэһилиэгин биир ытык ийэтэ Петрова Матрена Самсоновна оннук ыар дьылҕаламмыта. Петровтар Чирэпчигэ “Күөрэлээх” диэн алааска олорбуттара. Аҕалара Уйбаан Уйбаанабыс (Халымаай) нэһилиэгэр бастакы сэбиэтинэн талыллыбыт киһи, ийэлэрэ Матырыас, Бурцев Ефграф бииргэ төрөөбүт балта этэ. Кинилэр Кеша уонна Ефим диэн уолаттарыгар ханыы эрдэ тулаайах хаалбыт Кириллы (Гоголев Кирилл Иннокеньевиһы) иитэ ылан, улаатыннарбыттара. 1975 сыллаахха Бурцева Е. В.ахтан
хаалларбытынан, аҕалара Уйбаан сэлликтэн эрдэ өлбүт.
Аҕа дойду сэриитэ буолуор диэри үөрэх, үлэ суолун тутан олорбут уолаттардаах, аҥардас хаалбыт ийэҕэ ыарахан күннэр үүммүттэрэ.
Кирилл 1941 сыл атырдьах ыйын 15 күнүгэр бэбиэскэ тутан, сэриигэ ыҥырыллан, Москва анныгар кырыктаах киирсиилэргэ 1941 сыл кыһын өлбүтэ.
Иннокентий үөрэхтээх, сэриигэ ыҥырыллыар диэри оройуоҥҥа культура отделыгар үлэлээбитэ. Кини 1942 сыл бэс ыйын 23 күнүгэр сэриигэ барбыта. 199 СД, 17 – с СП рядовойунан сэриилэһэ сылдьан, Украинаҕа Харьковскай уобалас Шевченковскай оройуонун Червонотроицкай сэлиэнньэтигэр көмүллүбүтүн туһунан биллэрии кэлбитэ.
Ефим 1921 сыл төрүөх этэ, Мүрүгэ үөрэнэ сырыттаҕына сэрии саҕаламмыта. IX кылааһы бүтэрэн, сайын дойдутугар тахсан окко үлэлии сырыттаҕына, 1942 сыл бэс ыйын 16 күнүгэр бэбиэскэ тутан, быраатын Баасканы (Бурцев Василий Ефграфовиһы) сүгэн киирэн, бүтэһигин алааһын уутугар сөтүөлээн баран, сэриигэ барбыта. Эдэркээн Ефим 1943 сыл кулун тутар 6 күнүгэр уоттаах сэрии толоонугар сураҕа суох сүппүтүн туһунан бэллэрии кэлбитэ.
Бар дьоно, оччотооҕу салайааччылар олус айманыаҕа диэн аһынан, Матырыаска кэлбит хара суруктары кистээн, уһун кэмҥэ тиксэрбэккэ сылдьыбыттар эбит. Үс оҕотун сэрии буурҕатыгар сүтэрбит ийэ туһунан Бурцев В. Е., Данилов В. В. Ахтан кэпсииллэр:“Матырыас эмээхсин наһаа аһыныгас, амарах этэ. Чирэпчи оҕолоро бары “Эбээбит” диэн ааттыыллара. Кыра оҕолорго эргэ чабычах туттаран, Олом аннынааҕы “Тураахтаах”, “Маахы” алаастары ыраастатара, наар аһата сатыыра, лэппиэскэ сиэтэрэ. Эдэригэр ыанньыксыт, кэлин колхоз көтөх ньирэйдэрин көрөрө, ааҕар балаҕаҥҥа остуорастыыра.
Кэлин Матырыаһы аймахтара Сыырдааҕынан, Бороҕонунан олордон илдьэ сылдьыбыттара, олох өлөр охтуутугар Петров Петр Иванович Маайата көрөн – истэн көмүс уҥуоҕун көтөхпүтэ.
Хорсун сэрииһиттэр Кирилл, Иннокентий, Ефим албан ааттарын сэргэ кинилэр Ийэлэрэ, саха боростуой дьахтара, Матрена Самсоновна Петрова аата умнуллубатын, үүнэр көлүөнэ кини сырдык аатын ахтан, сүгүрүйэн, курутуйан ылыахтаах.
Кол-во отправленных детей на фронт: 3
Дети: Петров Иннокентий Иванович 1920 г.р.
Петров Ефим Иванович 1921 г.р.
Гоголев Кирилл Иннокентьевич 1911 г.р.